"රට මේ තත්ත්වයට පත්වෙලා තියෙන්නේ දීර්ඝකාලීන සැලසුම් සහිතව සංවර්ධනය ඉදිරියට ගෙන නොයෑම නිසයි" - ජනරජ ජාතික සංවිධායක සුමේධ රත්නායක

අපේ රට මේ තත්ත්වයට පත් ව තිබෙන්නේ දීර්ඝ කාලීන සැලසුම් සහිතව සංවර්ධනය ඉදිරියට ගෙන නොයාම නිසා බව එක්සත් ජනරජ පෙරමුණේ ජාතික සංවිධායක, ඉංජිනේරු සුමේධ රත්නායක මහතා පවසයි.

ජාතික සංවිධායකවරයා මේ බව ප්‍රකාශ කළේ පෙබරවාරි 6 වෙනිදා සිරස ටී.වී. ඔස්සේ පැවැති ‘සටන’ දේශපාලන සංවාදය හා එක්වෙමිනි.

“අපි ඇත්තටම දේශපාලන පක්ෂයක් වශයෙන් වසර එකහමාරක වගේ ප්‍රමාණයක අතීතයක් තමයි අපිට තිබෙන්නේ. අපිත් එක්ක ඉන්නේ පාර්ලිමේන්තුවේ ඉන්න දේශපාලඥයින් වශයෙන් ගත්තොත් එහෙම පාඨලී චම්පික රණවක මහත්මයා පමණයි. අනිකුත් මේ දේශපාලනය ගැන උනන්දුවක් දක්වන බොහෝ වෘත්තීයවේදීන් පිරිසක් එකතු වෙලා තමයි අපි මේ දේශපාලන පක්ෂය ගොඩ නැඟුවේ.

ඇත්තටම අප දකින්නේ මේ රට අද මේ වර්තමාන තත්ත්වයට පත්වෙලා තියෙන්නේ දීර්ඝකාලීන සැලසුම් සහිතව රටේ සංවර්ධනයට ඉදිරියට ගෙන යාම සිදු කරපු නැති නිසා කියලා. බොහෝ විට සිද්ධ වුණේ නොයෙකුත් දේශපාලන පක්ෂවල, ඒ දේශපාලන පක්ෂ නොයෙකුත් දර්ශනයන්ගෙන් මෙහෙයවූවා කියන්න පුළුවන්, ධනේශ්වර, ලිබරල්වාදී, සමාජවාදී, වාමාංශික, මෙවැනි වූ දර්ශනයන් පිළිබඳව කියන්න පුළුවන්. මේ ආකාරයෙන් කොයි ආකාරයෙන් ආවත් සිද්ධ වෙලා තියෙන්නේ එක රටට ගැලපෙන සැලැස්මක් යටතේ සංවර්ධනය ඉදිරියට ගියපු නැති නිසා රට දිනෙන් දින අගාධයට යෑම.

මේකේ ප්‍රතිඵලයක් විදිහට අද වෙනකොට අපි ආසියානු කලාපයේ ඉහළම විදුලි බිල ගෙවන රට බවට පත්වෙලා තියෙනවා. වියට්නාමය වගේ රටක් එක්ක ගත්තොත් අපේ විදුලි බිල 40% කින් විතර ඊට වඩා වැඩියි. මේක නිසා මේ කර්මාන්ත අපේ රට අත් ඇරලා යනවා. අපිට ගෙවන්න සිද්ධ වෙලා තියෙන ඉන්ධන සඳහා ඩීසල් සඳහා, පෙට්‍රල් සඳහා අපිට ගෙවන්න වෙලා තියෙනවා ඉහළම මිලක්. බංගලාදේශය වෙන්නේ ශ්‍රී ලංකාවේ රුපියල් වලින් ගත්තොත් ලීටරයක්, රුපියල් තුන්සිය විස්සක් විතර. වියට්නාමයේ වෙන්නේ රුපියල් දෙසිය හැත්තෑවක් පමණ. ඒ නිසා මේ ඉන්ධන කියන්නේ මේ ආර්ථිකයේ කොඳු නාරටිය අධික ඉන්ධන මිල නිසා අපිට අපේ රටේ කර්මාන්ත ඉදිරියට ගෙන යෑම කරගෙන යාමට බැරි වෙලා තියෙනවා.

අනිවාර්යෙන්ම එක් නිවැරදි සැලසුමක් ප්‍රායෝගික සැලසුමක් යටතේ මේ රට මෙහෙව්වේ නැත්නම් අපිට මේ වැටී තිබෙන අර්බුදයෙන් ගොඩ එන්නට බැහැ. ඒ නිසා අපේ ඉලක්කය වෙලා තියෙන්නේ අන්න එවැනි වූ දීර්ඝ කාලීන ප්‍රායෝගික වැඩපිළිවෙලක් යටතේ මේ රට ඉදිරියට ගෙන යාම සඳහා වූ දේශපාලන වැඩපිළිවෙලක්, ආර්ථික වැඩපිළිවෙලක් රටට ඉදිරිපත් කිරීම.

අපි හිතනවා මේ රටේ දේශපාලනයේ යෙදිලා ඉන්න, වගකීම් සහිත සියලු දෙනාගේම වගකීම වෙන්නේ තමන්ගේ පක්ෂයේ ගොඩ වැඩ කරගන්න උත්සාහ කරන්නේ නැතුව රටට ආදරය කරන මිනිසුන් විදිහට සියලුදෙනාම එක සාධාරණ පොදු වැඩපිළිවෙලකට එකතු වෙමින් රට ඉදිරියට ගෙන යාම තමයි කල යුත්තේ මේ මොහොතේ දී කියලා.”