Close
ජනරජ මාතර වෛද්‍ය සායනය සාර්ථකව ක්‍රියාත්මක වෙයි.
16Jun’24
එක්සත් ජනරජ පෙරමුණ මාතර දිස්ත්‍රික් සංවිධානය මගින් මාතර තිහගොඩ ප්‍රදේශයේ ගංවතුරින් විපතට පත්වූ ගම්වාසීන් වෙනුවෙන් වෛද්‍ය සායනයක් අද (ජුනි15) දින පෙරවරුවේ කිතලගම නාගරුක්ඛාරාම විහාරස්ථානයේ දී පවත්වන ලදී.
මෙය සංවිධානය වූයේ පක්ෂ සභාපති, විශේෂඥ වෛද්‍ය අජිත් අමරසිංහ මහතාගේ මූලිකත්වයෙනි. මෙම සායනය සඳහා ඔහු සමගින් ස්නායු පිළිබඳ විශේෂඥ වෛද්‍ය නිලුපුල් පෙරේරා මහතා සහ ශල්‍ය වෛද්‍ය විශේෂඥ අනිල් වීරසිංහ මහතා ද සහභාගි විණි.
මෙම සායනය වෙනුවෙන් අවශ්‍ය වූ බෙහෙත් සහ උපකරණ සියල්ල රෝගීන් වෙත ලබාදීම ද සිදුකෙරිණි. තවද මෙම සායනය මගින් රෝගීන් 150 කට ආසන්න පිරිසක් ඔවුනට අවශ්‍ය ප්‍රතිකාර ලබා ගන්නා ලදී.
මෙවැනි සායනයක් පිළිගත් දේශපාලන පක්ෂයක් මගින් පැවැත්වූ ප්‍රථම අවස්ථාව බව ප්‍රදේශවාසීන් පැවසූ අතර, එය ඔවුන්ගේ පැසසුමට ලක් විය.
මෙම කටයුතු ගම් මට්ටමේ සංවිධානය අපගේ කඹුරුපිටිය ආසන ක්‍රියාකාරී සහ පක්ෂයේ ජාතික මණ්ඩල සභික පුන්‍යතිලක මාරඹගේ මහතා විසින් සිදු කරන ලදී.
මෙම අවස්ථාවට මාතර දිස්ත්‍රික් සම්බන්ධීකාරක සහ මධ්‍යම කාරක සභික ඉංජිනේරු චන්ද්‍රසිරි ලියනගේ, අකුරැස්ස ආසන සම්බන්ධීකාරක සහ මධ්‍යම කාරක සභික ගාමිණී සාන්ත සහ පක්ෂ ක්‍රියාකාරීන් වන අනිල් නෙත්තිකුමාර සහ එච්. ඩබ්. තිලකරත්න මහත්වරුන් ද, සහභාගි වූහ.
